Ischi wärta

Ischi Wärta widärspiäglunt oi di vo ischu Vorgängär, dära Gruppu Räbbüru mit Fokus uf Eifachheit:

Qualität immär!

Wiär mächä kei Kompromissa im Hiblick uf z’Produkt, darum kontrolliäräwär di Produktionskätti vo A-Z und wäns z’Produkt bässär macht, wimdäwär oi mal Mitti Novämbär bi Vollmond inär Nacht mit -13 Grad. Wiär mächä nur Wiina wawär oi selber so am liäbstu würdi trichu, nix biliäbig Üstüschbars. Genau üs däm Grund heiwär oi nur wenigi värschidni Sortä jedes Jahr, wiär si fokussiärt nit so multitasking.

Wiär värzällä kei bullshit

Wiär si nit perfäkt, im Gäguteil, kilometerwiit derfa äntfärnt. Was wär aber definitv scho jetz si isch transpäränt. Wiär wällä isch värbässru, abär das brücht Ziit und nit nur Blabla. Darum nännä wär ischi Schwächinä oi «Schwächinä» und nit apa «Challenges» odär «Opportunities», nur vär dass bässär tehnt. In gwissu Biricha siwär momentan ganz ehrlich no zimli schlächt unärwägs.

wiär schaffä mitu händ

Wänmu so chli wiä wiär isch, dä chamu sich das ärloibu, müäsmu sogar. Inu Räbä und im Chällär sätzäwär voll uf Handarbeit. In ubär 150 Arbeitsschritta äntsteid än Fläschu Indianär, wiäsch schliässli bi diär ufum Tisch isch. Mal bricht bim Foltru än Trägärstoss ab odär isch äs Etigget nit ganz grad kläbt, abär das passiärt halt, nit so tragisch.

profit an viärtär ställ

Wiär si nit uf Wachstum gibirschtut, ämäl nit um jedu Priis. Wiär wällä scho no bitz waxu und äppis verdiänu. Das wälläwär abär mit Chundä, wa biwusst Wii konsumiärunt. Oi mal än Fläschu wenigär, aber darfär d’Richtigi. Wiär sätzä ischi Prioritätä wiä wär wällä. Ufu erstu drii Ställä stehnt bi isch: Mänschu, Planet und Produkt (alphabetisch) därna ersch där Profit.