Was isch indianär?

Indianär isch än Micro-Wiichälläri inär Wallisär Wiimetropolu Salgesch!

Wiär kännä isch mit Räbä üs

D'ältuscht Generation vo Indianär isch scho sit meh wa 30 Jahr praktisch täglich, Jahr ver Jahr bi Schnee, Regu und brüätundär Hitz inu Räbä tätig. Wiär biarbeite knapp 4 Hektare mit uber 20 verschidnu Sortä. D'schönsti Räbä zha isch immer d'Ambition gsi und Handarbeit der Weg dahin. Äs alts Indianär-Sprichwort seit "Mu chat mit güätu Tribla schlächtä Wii machu, abär mit schlächtu Tribla kei güätä Wii."

Wiär si chlei

Jährlich verarbeitewer in Handarbeit knapp 1'500 kg üsgwählti Tribla üsu eigunu Räbbärga zu Wii. Am liäbschtu mächäwär Wallisär Spezialitätä, oder dä ächti Assemblage. Wiär bigleite in knapp 300 Arbeitsschritta där gsamt Prozäss vom Räbstock bis ins Glas, vo Januar bis Dezämbär.

Wiär si unabhängig

Hei als Wiichälläri wedär en jahrzähntelangi Familitradition, no en Lieferwaguflottu oder Üssudienstmitarbeiter in schlächt sitzundu Azig. Wiär schaffä ver isch und nur mit ischu eigunu Produkt, wawär zu 100% därhinner chänä steh.

Wiär si ambitioniärt

Wiär wällä in Züäkunft irgendwänn äs paar vonu bästu Wallisär Wiina ufär Wält produziäru und Du chasch isch gäru ufum Wäg dahin bigleitu. Wiär gloibe nit, dass wer d'Wiiwelt irgendwiä wärdä verändru. Aber wiär wällä än güäti Ziit ha - mitera Vollkaskomentalität, dera gwissu Naivität und Offuheit ver Nois.

Wiär mächä fehlär

Indianär träffunt oi mal Fehlentscheidigä, schittrunt, kijunt abum Ross, stigunt dä abär widär üf und ritunt wiitär. Wiär würdi isch froiju wänär mit isch bitz mitrität.

Grossus Indianär-Ehruwort: Wiär verchöifä nur Wina, wa wiär oi sälbär so gäru trichu!