Was isch indianär?

Wiär si än 100% unabhängig und familigfiährti Mikro-Wiichälläri im Härzu vom Wallis, im Wiidorf Salgesch. Insgsamt bsitzäwär knapp 4 Häktarä Räbä mit 16 verschidnu Sortä. Als Sälbstichällärär verarbeitäwär jedoch aktuell nur än Bruchteil vonär Trübumängi zu maximal 6 verschidnu ächtu Wallisär Wiina. Aber wieso “ächt”? Will wär im Chällär vo A-Z üsschliässlich Tribla üs ischu Räbä verarbeitä und darum voll derhinnär chänä stah. Jedä Arbeitsschritt mächwär sälbär. Vo Januar bis Dezämbär, vo Schniidu bis Wimdu, vo Prässu bis Abfillu, alles do it ourselves.

Wiär wällä das nit romantisiäru, das isch meistens knallhärti Arbeit. Aber Indianär si isch än Läbunsiställig, än Philosophie und nit apa än kulturelli Aneignig. Äs geit isch um äs Gfühl, drum ehrlich und sozial zsi, drum Sachä generäll oi mal anärsch azgah, so wiä än Indianär halt. Wiär si stabil und mächä nit jedä Hype mit.

Gigründut heiwär Indianär 2012, sithär lehräwär immär widär Nois därzüä und därbi tolli Liit kännu.

Fastnacht Salgesch 1989,  Indianär  trifft uf Zorro und schini Füüdi-Gäng

Fastnacht Salgesch 1989, Indianär trifft uf Zorro und schini Füüdi-Gäng


Wieso heissÄDär dä Indianär?

Z’Wort Indianär isch vär isch kei politisch üfgladni Aspilig uf indigeni Völkär oder Uriwohnär. Äs bischribt fär isch enär än Läbunsistellig, än Art Entscheida z’fällu und Prioritätä z’sätzu. Liit mit Stil, Ehrlichkeit, Konsequänz und Stolz, grossär Apassigsfähigkeit, dumä härtu Grind und dära loyalu Gäng mit schönu Pfärd. Indianär sind müätig, öi mal üfbrausund, abär stets bischeidu, konsequänt und gäru inär Natur. Schi widärspieglunt ischi Wärta und ischi Art di chlei Firma hiä z’fiähru:

  • Will Indianär üs Fehlär lehrunt. Wänsch mal vom Pfärd kijunt chlopfuntsch där Stöib ab, stiigunt widär üf und ritunt witär.

  • Will där “Ä” in dem Wort typisch fär ischu Wallisär Dialäkt und somit fär ischi Härkunft isch.

  • Wills inär Wiibranchu, wiä inär Politik und der Tageschau mittlärwilu schlichtwäg z’vili komischi Cowboys und z’wenig Indianär git!

  • Wägu där Ästhetik, dum Klang und där ganzu Bildärwält wa das Wort mit schich bringt.

  • Will di .com-URL no verfiägbar und bi Google d’Süächmaschinuoptimiärig relativ eifach isch gsi.

  • Will där Marsimoto än passundä Song darzüä gmacht hät.

  • Will d’Froi ufär Poscht immär müäss grinsu wännsch äs Päckli vär Indianär värchunt.