Gschicht

 

1. Generation

Anna & Santino Caldelari-Oggier

Di Gschicht vo Indianär fat im Prinzip um 1910 a. Där Santino Caldelari senior isch als Choch mitära Mässärchistu vom Tessin ins Val d’Anniviers cho und hät da imä Restaurant güät bitüächti Ägländär bichocht. Glichänorts hät di 10 Jahr jungri Anna Oggier üs Salgesch als Kaffeechochäri gschafft. So heint schi sich kännuglehrt und nit vil spetär kheiratut.

Nadär Hochziit hät er inär Aluminiumfabrik z’Chippis gschafft, wadär ufgrund vom Metalstoib erchrankt isch. Unär du Kurüfenthalt hädär agfangu schinär wahru Liduschaft nahzga und hät ganz Indianär wenig spetär d’erst Velowerkstatt inär Region äröffnut.

In der Ziit heinsch vo Annas insolväntum Vatär dri Parzällä Räbä gärbt (Lizerne, Dreispitz und Chanzeli). Jedä Hüshalt hät damals äs Fassji mit eigunum Wii im Chällär kha, zum Chochu, färu Eigugibrüch und fär wänn Gäscht sind cho. Das isch vor knapp 100 Jahr där Afang gsi vom Wiibü inär Famili Caldelari.

Ufumä Töff vo Neckarsulm

Ufumä Töff vo Neckarsulm


2. Generation

Elsa & Emil Caldelari-Mathier

Där mittlär Sohn vonär Anna und dum Santino senior, där Emil, hät z’ersch z’Sidärs än Lehr zum «Wasser- und Heizigsinstallateur» abgschlossu und sich churz druf mit schinär eigunt Wärkstatt sälbstständig gmacht. Na schinär Hochziit mitär Elsa Mathier, hädär üs der Wärkstatt üsa im Dorf d’Wassärleitigä fär d’Räbä z’biwässru verleit und widerum als erstä uberhöipt d’Räbä öi uf Draht gizogu. D’netigi Installationä dadärfir sind in Handarbeit entstanu, genau wiä di zahlrichi Bascos. Schini Eigukreation, meh als äs Fortbiwägigsmittil, äs rägilrächts Statussymbol.

Nadära Diabetes-Erchrankig hät der Emil sich ganz Indianär väru Vollziit-Räbbü äntschidu. Schi heint zwar än Viehlzahl noiji Parzällä koift, abär witerhin ei Chüäh und zwei Schwii ghaltu, obwohl där Grossteil vonär Achärflächi ufum gsamtu Gmeiareal noi färu Räbbü gopfrut isch wordu. Z’Fassji im Chällär isch än Tradition giblibu und d’Inahmä üsu Räbä heint z’Dorf finanziell am Läbu khaltu. Wänns inu 1950är äs schlimms Frostjahr hät gigäh, is dum Grossteil vonär Bivölkrig rägilrächt an d’Existänz gangu.

Emil (links) mit schinum Brüädär Marcel ufumä sälbär gmachtu Basco

Emil (links) mit schinum Brüädär Marcel ufumä sälbär gmachtu Basco


3. Generation

Alice & Aldo Caldelari-Brigger

Der drittä Sohn vonär Elsa und dum Emil, där Aldo, isch 1954 uf d’Wält cho und hät scho vo chlei üf mit schinu Schwästrä und Briädär im Räbbärg mitkholfu. Gat oi schinä ältär Brüädär, där Santino junior, isch dadärbi immär än grossi Inspirationsquällu ver inu gsi und öi er hät där Salgescher Wiibü nachhaltig mitgiprägt! Nadära Üsbildig zum Choch hät där Aldo wia scho schinä Grossvatär, ufum Brüäf schini Froi kännuglehrt.

D’Alice Brigger chunt vo Stalduriäd üsum Vispertal, wa irusch Vatär där Viktor näbubrüäflich sälbär öi scho eiguni Räbä hät kha. Di Parzällä wa damals no där ortstypisch “Gwäss” isch agibüt wordu, bifindunt sich no hitu im Familibsitz. Hiä waxunt hitu ufum optimalu Terroir d’Heida Tribla fär ischu “Tigär”.

1986 heint schi beidi nadär Hochziit und der Giburt vo irusch zwei Büäbu ganz Indianär entschidu där damalig Job anu Nagil z’heichu, z’Wirtu üfzgäh und alläs uf d’Chartu Räbä z’sätzu. Sithär heinsch zahlrichi Parzällä därzüä koift, umgipflanzt, väredlut und so där Räbbärg immär aktuell gibhaltu. Schi sind d’lätschti zwei vonära inzwischu üsgstorbnu Art gsi. Sit der Gründig vo Indianär gits kei reini Räbbüru meh z’Salgesch, also Liit wa üsschliässli vom Räbbü läbunt.

Vorum Gwürztraminär inu Räbä z’Miège

Vorum Gwürztraminär inu Räbä z’Miège


4. Generation

Romeo & Sandro Caldelari

Wiär beid Sehn hei scho vo chli üf ischi friji Namittäg, Wuchunänd und Feriä inu Räbä värbrungu, dass zwar nit immär üs persönlichär Uberziigig, abär immärhin mit gnüäg Sunnucreme.

Hitu heiwär im Familibsitz knapp 4 Hektarä Räbä mit 16 värschidnu Sortä. Di Parzällä sind an unärschidlichu Lagä und där Grossteil vom Trübugüät gäbäwär an Chälläriä ab. Där Wiibü bifindut schich aktuell mal widär imä Wandil. Äs isch jedes Jahr än Lottärie, intensiv und abwechsligsriich: Egal ob ungloiblich stotzund oder steinig, mit Hitzeschlag odär Hännuhüt, Hagilsturm, Föhn, Schnee, Niederschläg, Dürri, Froscht, Pilzbifall odär japanischu Fleigä, längwilig wird’s oi in Züäkunft nit.